ҚР медициналық ЖОО-ға өту межесі 92 балл - С. Қайырбекова

Қазақстанда медициналық ЖОО-ларға ҰБТ-ның ең жоғары балын жинаған талапкерлер түсті. «Жалпы медицина» мамандығы бойынша ең төменгі өту балының межесі  92-ні құрады, деп хабарлады Семей Медициналық университетінің студенттерімен кездесуде ҚР Денсаулық сақтау және әлеуметтік даму вице-министрі Салидат Қайырбекова.
«Қазақстан жолы - 2050: Бір мақсат, бір мүдде, бір болашақ» атты Мемлекет басшысының Қазақстан халқына Жолдауын түсіндіру бойынша өңірге жұмыс сапары барысында С. Қайырбекова Медициналық университет медорталығының кардиохирургиялық бөлімшесін, консультативтік-диагностикалық орталығын аралады, университеттің бітіруші курсының студенттерімен кездесті.

Салидат Қайырбекова кездесуде студенттерді даярлау сапасын арттыру маңыздылығына баса назар аударды.

Медициналық мамандардың тапшылығы проблемасын шешуге қатысты С. Қайырбекова түлектерді жұмысқа орналастыру нәтижесі бойынша 2014 жылы медициналық мамандар тапшылығын 30 пайызға қысқарту күтіліп отырғандығын мәлім етті.

Министрлік сондай-ақ кадрлардың біліктілігін арттыруға көп көңіл бөлуде. Республикалық бюджет аясында жыл сайын кемінде 20 пайыз мамандарды оқыту көзделген, бұл 5 жыл ішінде елдің барлық медициналық қызметкерлерін, ел ішінде, шетелде, сондай-ақ шетел мамандарын тарта отырып, оқытуға мүмкіндік береді. Республикалық білім және ғылым  ұйымдарында соңғы 3 жылда 100 мыңнан астам мамандар оқытылды. Шетелде оқытуға 600-ден астам қазақстандық мамандар жіберілді. Оқыту Жапония, АҚШ, Германия, Франция, Дания, Оңтүстік Корея және т.б. елдерде жүзеге асырылды. Үздік шетел мамандарын шақыртып, шеберлік сыныбын өткізу тәжірибесі кеңінен енгізілуде.

Источник: inform.kz